Dagiti Masansan a Masaludsod

Rehistrasion ti Botante Babaen ti Online (Online Voter Registration)

Saludsod: Ania daytoy rehistrasion ti botante babaen ti online?

Sungbat: Ti rehistrasion ti botante babaen ti online ket ipaayna kadagiti kualipikado a residente ti gundaway a makapagparehistro nga agbotos wenno mangpabaro iti rehistrasionda gapu ta nagbaliwen ti adres ken naganda babaen ti panangusarda iti natalged a website.

Saludsod: Kasano a makapagparehistroak nga agbotos babaen ti online?

Sungbat: Tapno makapagparehistro babaen ti online, bisitaen ti olvr.hawaii.gov. Nasken a makaitedka iti Lisensia nga Agmaneho iti Hawaii wenno ID nga inted ti Estado, ken ti Numero ti Social Security-m. No dimo maited dagitoy, mabalinmo ti mangisubmitir iti papel a Pormulario ti Rehistrasion ti Botante ken Permanente a Panagbotos Babaen ti Koreo (Voter Registration & Permanent Absentee Application) babaen ti panangibusonmo, wenno personal nga idatagmo.

Saludsod: Adda kadi naituding a maudi nga aldaw (deadline) para iti panagparehistro nga agbotos babaen ti online?

Sungbat: Ti maudi nga aldaw a panagparehistro babaen ti online ket 30 nga aldaw sakbay ti eleksion iti alas 4:30 iti malem. Dagiti maudi nga aldaw a panagparehistro para iti 2016 ket dagiti sumaganad:

Eleksion Primaria: Hulio 9, 2020
Eleksion Heneral: Oktubre 5, 2020

Saludsod: Natalged kadi met laeng ti agparehistro babaen ti online?

Sungbat: Wen. Ti sistema ti rehistrasion ti botante babaen ti online ket manmanteneren ti Hawaii State Government Private Cloud, ken imatmatonan ti Office of Information Management and Technology.

Saludsod: Kasano a maproseso ti aplikasionko?

Sungbat: Ti sistema nga online ket kasapulanna a mangted ti aplikante iti pammaneknek ti kinaasinona a kas koma iti Lisensia nga Agmaneho iti Hawaii wenno ID nga inted ti Estado, ken Numero ti Social Security, a maberipikarto (maammuan no husto wenno saan) babaen ti datos wenno impormasion nga aggapu iti database ti Departamento ti Transportasion, a manmanteneren ti Department of Information Technology ti Siudad ken County ti Honolulu.

Apaman a maawatna ti aplikasion, repasuen ken aprobaranto ti Opisina ti Klerk (Clerk’s Office).

Saludsod: Automatiko kadi a rehistradoak a botante apaman a maisubmitirko ti aplikasionko babaen ti online?
Sungbat: Saan. Maysa a nalaka a wagas a panagisubmitir iti impormasion ti panagparehistro a botante babaen ti online. Apaman a maawatna ti aplikasion, repasuen ken aprobaranto ti akinsakup kenka nga Opisina ti Klerk (Clerk’s Office).

Saludsod: Mapakaammuanakto kadi apaman a makapagparehistroak?

Sungbat: Wen. Ti impormasion nga inlanadmo iti aplikasionmo ket beripikaren ti makasakup kenka nga Opisina ti Klerk (Clerk’s Office). Addanto maipatulod kenka a postcard a mangpakaammo kenka (notification postcard) a mangberipikar iti istatus ti rehistrasionmo a kas botante sakbay ti eleksion.

No ti impormasion maipanggep kenka ket saan a maberipikar, mapakaammuankanto no kasano a kompletuem ti rehistrasionmo a kas botante.

Saludsod: Makabotosak kadi babaen ti online?

Sungbat: Saan.

Saludsod: Kompidensial wenno di maammuan ti sabali dagiti impormasion a mailanad iti rehistrasion ti botante?

Sungbat: Ipalubos laeng ti paglintegan ti Hawaii ti pannakairuar ti sumagmamano nga impormasion maipanggep iti botante kadagiti indibidual wenno organisasion ngem para kadagiti mausar laeng iti eleksion. Ti laeng maipubliko ket ti nagan ti botante, distrito/presinto, ken ti istatus ti rehistrasionna a kas botante.Dagiti Narebisar a Paglintegan ti Hawaii (HRS §11-97)

 

↑ Agsubli iti ngato



Rehistrasion ti Botante (Voter Registration)

Saludsod: Ania ti aramidek tapno makapagparehistroak nga agbotos?
Sungbat: Mabalinmo ti agparehistro babaen ti online, wenno babaen ti panangisubmitirmo iti Pormulario ti Rehistrasion ti Botante ken Permanente a Panagbotos Babaen ti Koreo (Voter Registration & Permanent Absentee Application) babaen ti korero wenno personal nga idatagmo.

Nayonan ti ammom maipanggep iti rehistrasion ti botante (voter registration).

Salusod: Kasano a maammuak a rehistradoakon a botante?
Sungbat: Mabalin a maberipikarmo ti rehistrasionmo a kas botante babaen ti online babaen ti panangtedmo iti Lisensiam nga Agmaneho iti Hawaii wenno ID nga inted ti Estado, ken ti Numero ti Social Security-m.

Mabalinnaka pay a kontaken (contact us) iti 808-453-VOTE (8683). Dagiti agnaed kadagiti kakaarruba nga isla (Neighbor Islands) ket mabalinda ti tumawag a libre (toll free) iti (800) 442-VOTE (8683). Nasken a nakasaganaka a mangited iti naganmo, adres ti residensiam, ken petsa ti pannakayanakmo tapno maberipikar ti istatus wenno kasasaadmo a kas botante.

Saludsod: Nasken kadi nga agparehistroak sakbay ti tunggal eleksion?
Sungbat: Saan, ta apaman a maysakan a rehistrado a botante, saanen a nasken nga agparehistroka manen para iti tunggal eleksion. Ti panagparehistro manen (re-registration) ket kasapulan laeng no immakarka wenno legal a pinabaliwam ti naganmo.

Saludsod: Maysa a makipagili wenno sititsen ti U.S. Citizen nga agnanaed iti ballasiw-taaw, kasano ti panagparehistrok tapno makabotosak?
Sungbat: Para iti impormasion no kasano a makapagparehistroka ken no kasano a makaalaka iti balota, bisitaen ti Dagiti Militar ken Adda iti Ballasiw-taaw a Botante (Military and Overseas Voters).

Saludsod: Addaak iti military, kasano a makaalaak iti balota?
Sungbat: Para iti impormasion no kasano a makaalaka iti balota a maikoreo (absentee ballot), bisitaen ti Dagiti Militar ken Adda iti Ballasiw-taaw a Botante (Military and Overseas Voters).

Saludsod: Kasano ti panangalak iti maysa a dokumento a mangipaneknek a rehistradoak nga agbotos iti Hawaii?
Sungbat: Tapno makaalaka iti sertipiko ti rehistrasionmo a kas botante, kontaken ti Opisina ti Klerk  (Clerk’s Office) a nakairehistroam nga agbotos.

Saludsod: Kasano ti panangpakanselarko iti rehistrasionko a kas botante?
Sungbat: Tapno mapakansela wenno mapaikkatmo ti rehistrasionmo a kas botante, kontakem ti Opisina ti Klerk (Clerk’s Office) a nakairehistroam nga agbotos.

Saludsod: Agtawenakon iti 16, mabalin kadin nga agparehistroak nga agbotos?
Sungbat: Ipalubos ti paglintegan ti estado ti maisapsapa a panagbotos (pre-registration) kadagiti agtawen iti 16, ngrem masapul nga agtawenkanton iti 18 iti aldaw ti eleksion tapno mapalubosanka nga agbotos.

↑ Agsubli iti ngato



Panagbotos Babaen ti Koreo (Voting by Mail)

Q: Ania ti Panagbotos Babaen ti Koreo?
A: Yimplementar ti Linteg 136, SLH 2019 dagiti eleksion babaen ti koreo. Daytoy a linteg ikkatenna ti panagusar kadagiti presinto a pagbotosan dagiti botante iti aldaw ti eleksion ket kas sukat daytoy, isu ti automatiko a pannakaikoreo ti balota kadagiti rehistrado a botante.    

Q: Kasano ti panagbotosko?
A: Masapul a rehistradoka a botante tapno makaawatka iti balota. Ti Opisina ti Klerk a makasakup kenka isagana ken ibusonna ti pakete ti balotam sumurok-kumurang a 3 a lawas sakbay ti eleksion.

Apaman a nabotosam ti balotam, ikargam ti balota iti sobre a pagipanan iti balota a mangipatalged iti karbengam nga awan ti makaammo iti linaon ti balotam, sa kalpasanna iserrekmo iti sobre a pangisubli iti balota. Ti sobre  a pangisubli iti balota nga awanan iti pirma ken dinto mairaman iti panagbilang.

Mabalin nga isublim ti nagbotosam a balota: babaen ti koreo, wenno mismo a sika ti mangisubli iti naituding a lugar a pagipanan. Amin a balota ket masapul a maawat ti Opisina ti Klerk iti di naladladaw ngem 7 p.m. iti Aldaw ti Eleksion. Awan serserbi ti timbre ti opisina ti koreo!

Q: Kasanon no diak naawat ti balotak?

A: Maipatulod dagiti pakete ti balota babaen ti koreo kadagiti amin nga umno ti pannakairehistroda a botante sumurok-kumurang a 3 a lawas sakbay ti eleksion. No dimo maawat ti pakete ti balota, awagam ti Opisina ti Klerk.

Q: Kasanon no adda naaramidko a biddut iti balotak?

A: No adda biddut, napukaw, wenno nadadaelmo ti balotam, mabalinmo ti agkiddaw iti sukatna iti Opisina ti Klerk.

Q: Mairaman kadi iti panagbilang ti botosko no diak nagbotos kadagiti amin a banag a mabotosan ken/wenno kadagiti kandidato?

A: Wen, mairaman ti balotam iti panagbilang.

Q: Mabalin kadi a baliwak ti agbotos no naisublikon ti balotak?

A: Saan. Iti kanito nga insublimon ti balotam ken naawaten ti Opisina ti Klerk, maibilangen daytoy a nalpasen a panagbotos ket ngarud saankan a makaawat iti baro a balota.

Q: Apay a nasken a pirmaak ti sobre a pangisubli iti balota?

A: Ti pirmam iti sobre a pangisubli iti balota ket isu ti pangkitaan dagiti opisial ti eleksion a sika ti nasao a botante. Maidilig ti pirmam iti sobre iti pirmam nga adda iti rekord ti rehistrasion ti botante. No dimo pirmaan ti sobre a pangisubli iti balota, dinto mairaman ti balotam iti panagbilang.

Q: Kasano a maawatko ti balotak no addaak iti bakasion wenno awanak ta addaak iti pagbasbasaak a kolehio?

A: Dagiti botante nga awanto bayat ti eleksion, mabalin a kiddawenda a maipatulod babaen ti koreo ti balotada iti sabali nga adres. Kompletuen laeng ti  aplikasion para iti maminsan-laeng nga absentee a botante ken ilanad no sadino ti kayatmo a pakaipatulodan ti balota.

Q: Mabalinko kadi ti agbotos a personal?

A: Wen, mabalinmo ti agbotos a personal babaen ti ipapanmo iti ania man a sentro a pakaserbian ti botante (voter service center) iti bukodmo a county. Silulukat dagiti sentro a pakaserbian dagiti botante 10 nga aldaw agingga iti Aldaw ti Eleksion para iti personal a panagbotos, ken panagrehistro ti botante ken panagbotosna metten iti dayta met laeng nga aldaw.

↑ Agsubli iti ngato