Dagiti Botante

Maisapsapa a Panagbotos (Early Voting)

Saan a nasken nga aguray dagiti botante agingga iti aldaw ti eleksion tapno agbotosda. Asino man a rehistrado a botante ket mabalinna ti agkiddaw iti mail ballot wenno balota a maipatulod babaen ti koreo wenno mabalinna ti agbotos iti maysa nga early walk-in a pagbotosan iti sakup ti bukodda a county.

Panagbotos Babaen ti Koreo

Iti panangkiddaw a maaddaanka iti permanente a balota a maikoreo, masapul a kompletuem ti Wikiwiki Rehistrasion ti Botante ken Aplikasion iti Permanente nga Absentee (Wikiwiki Voter Registration & Permanent Absentee Application) wenno isubmitirmo ti kiddawmo online wenno babaen ti Internet iti www.elections.hawaii.gov.

Maisardeng ti karbengan a kas permanente nga agbotos babaen ti koreo no mapasamak ti ania man kadagitoy:

  • Mapaay ti botante a mangisubli iti balota a nagbotosanna agingga iti alas 6:00 iti malem a panagserra dagiti lugar a pagbotosan iti agpada nga eleksion primaria ken heneral.
  • No matay ti botante, no mapukawna ti karbenganna nga agbotos, no agrehistro a kas botante iti sabali a lugar, wenno madiskualipikar nga agbotos.
  • Saan a maideliber wenno makadanon gapu iti ania man a rason ti balota ti botante, notification card (kard ti pakaammo), wenno ania man a maikoreo a materiales a mainaig iti eleksion.
  • Kiddawen ti botante babaen ti panagsuratna a maigibusen ti istatusna a kas permanente nga agbotos babaen ti koreo.

No kayat ti agkiddaw iti balota a maikoreo (mail ballot) para iti maysa nga espesipiko a lugar wenno espesipiko nga eleksion wenno siklo ti eleksion, kompletuen ti Wikiwiki Rehistrasion ti Botante ken Aplikasion iti Permanente nga Absentee (Wikiwiki Absentee Application). Agpada dagitoy nga aplikasion a maala iti website ti Opisina Dagiti Eleksion (Office of the Elections), ken iti ania man kadagitoy a lugar:

  • Opisina Dagiti Eleksion
  • Dagiti Opisina Dagiti Klerk
  • Dagiti Biblioteka ti Estado
  • Dagiti Opisina Postal
  • Dagiti Ahensia ti Estado
  • Dagiti Sanga (Satellite) ti City Hall

Maudi nga Aldaw (Deadline) a Panagkiddaw iti Balota a Maikoreo
Dagiti kiddaw para iti balota a maikoreo ket masapul a maawat ti Opisina ti Klerk (Clerk’s Office) a makasakup kenka iti di naladladaw ngem pito (7) nga aldaw sakbay ti eleksion.

Eleksion Primaria: Agosto 4, 2018

Eleksion Heneral: Oktubre 30, 2018

Dagiti Espesial a Situasion
Ti kiddaw para iti absentee ballot wenno balota a maikoreo (balota a para iti botante a di makapan iti nakairehistroanna tapno agbotos) a maawat ti Opisina ti Klerk kalpasan ti deadline ket mabalin laeng a maaprobaran kadagiti espesial a situasion a determinaren ti klerk ti county (kas koma, naospital ti botante sakbay unay ti aldaw ti eleksion ket saan a makapan iti lugar a pagbotosan tapno makapagbotos). Kontakenyo koma ti klerk ti county no patienyo nga espesial a kaso ti situasionyo.

Dagiti Nagbotosan a Balota
Dagiti nagbotosan a balota ket masapul a maawat ti Opisina ti Klerk a makasakup kadakayo iti di naladladaw ngem iti panagserra dagiti lugar a pagbotosan iti aldaw ti eleksion.

Personal a Panagbotos a Masapa

Dagiti botante ket mabalinda met ti mapan agbotos kadagiti early walk-in location iti bukodda a county tapno agbotosda sakbay ti naituding nga aldaw ti eleksion. Adtoy dagiti petsa a panagbotos a masapa (early walk-in dates):

Eleksion Primaria: Julio 30 – Agosto 9, 2018

Eleksion Heneral: Oktubre 23 – Nobiembre 3, 2016

Adda Pay Saludsodmo? Bisitaen ti Dagiti Masansan a Masaludsod (Frequently Asked Questions) para kadagiti sungbat dagiti masansan a gagangay a masalsaludsod maipanggep iti panagbotos babaen ti koreo wenno botos a maipatulod babaen ti koreo.

 

↑ Agsubli iti ngato



Estudiante iti Kolehio (College Student)

Maysaak a residente ti Hawaii, ken…

Agnanaedak iti uneg ti kampus
Mabalinmo ti mangisubmitir iti kiddaw a maipatulodanka iti balota babaen ti koreo (absentee ballot) iti adresmo iti kampus babaen ti panangkompletom iti Wikiwiki Aplikasion iti Panagbotos Babaen ti Koreo (Wikiwiki Absentee Application).

Sumsumrekak iti eskuela iti sabali nga estado/gangganaet a pagilian
No kalikagumam ti makapagbotos kadagiti eleksion iti Hawaii, mabalinmo ti agkiddaw iti balota a maipatulod kenka iti adresmo iti kolehio babaen ti panangkompletom iti Wikiwiki Aplikasion iti Panagbotos Babaen ti Koreo (Wikiwiki Absentee Application). Nasken a mangisubmitirka iti kiddaw para iti absentee ballot para iti tunggal eleksion a kaawanmo iti residensiam iti Hawaii.

Nayonam ti ammom maipanggep iti maisapsapa a panagbotos (early voting).

Agnaedak iti sabali nga estado, ken sumsumrekak iti eskuela iti Hawaii. Kayatko ti…

Agbotos kadagiti eleksion iti Hawaii
Bisitaen ti rehistrasion ti botante (voter registration) tapno manayonan ti ammom maipanggep iti no kasano ti agbalin a botante iti Hawaii.

Agbotos kadagiti eleksion iti bukodko a lugar
Kontakem ti Opisina Dagiti Eleksion iti bukodmo a lugar ken no kasano a makaawatka iti balota bayat ti kaaddam iti Hawaii.

Tapno makaalaka iti Sertipiko ti Rehistrasion ti Botante, kontakem ti makasakup kenka nga Opisina ti Klerk (Clerk’s Office).

↑ Agsubli iti ngato



Dagiti Militar ken Adda iti Ballasiw-Taaw a Botante (Military and Overseas Voters)

Ti Linteg iti Absentee a Panagbotos Dagiti Nakauniporme ken Makipagili nga Adda iti Ballasiw-Taaw (Uniformed and Overseas Citizens Absentee Voting Act wenno UOCAVA) ket nangparnuay iti espesial a probision a para kadagiti awan (absent) a makipagili nga agserserbi iti military ken dagiti adda iti ballasiw-taaw nga agbotos babaen ti koreo kadagiti eleksion primaria, heneral ken kadagiti espesial nga eleksion a para kadagiti opisina pederal; ken pannakaipalubos dagitoy nga indibidual nga agusar iti federal write-in absentee ballot (FWAB) iti eleksion heneral a para kadagiti opisina pederal.

Asino Dagiti Botante a Sakupen ti UOCAVA?

  • Dagiti nakauniporme nga agserserbi iti Estados Unidos (United States Uniformed Services) ken dagiti marino (merchant marines) ken dagiti kameng ti pamiliada
  • Dagiti makipagili (sitisen) iti Estados Unidos nga agnanaed iti ruar ti Estados

Panagparehistro Tapno Makabotos
Amin a militar ken agnanaed iti ballasiw-taaw a botante ket masapul a nakarehistroda nga agbotos tapno iti kasta, makaalada iti balota. Dagiti botante a sakupen ti UOCAVA ket mabalinda ti agparehistro babaen ti panangkompletoda iti Federal Post Card Application (FPCA). Ti nakompleto nga FPCA ket masapul a maawat ti Opisina ti Klerk wenno minarkaan-ti-opisina-postal (postmarked) iti di naladladaw ngem 30 nga aldaw sakbay ti eleksion tapno mainayon ti aplikante iti listaan dagiti botante.

Eleksion Primaria: Hulio 12, 2018

Eleksion Heneral: Oktubre 8, 2018

Panagkiddaw iti Balota a Maikoreo (Mail Ballot)
Dagiti agdama a rehistrado a botante ket mabalinda ti agkiddaw para iti absentee ballot wenno mail ballot babaen ti panangkompletoda iti Federal Post Card Application (FPCA). Ti FPCA ket masapul a maawat ti makasakup kadakuada nga Opisina ti Klerk iti di naladladaw ngem pito (7) nga aldaw sakbay ti eleksion.

Eleksion Primaria: Agosto 4, 2018

Eleksion Heneral: Oktubre 30, 2018

Dagiti nagbotosan wenno naaramat a balota ket masapul a maawat ti Opisina ti Klerk agingga iti panagserra ti panagbotos iti aldaw iti eleksion.

Eleksion Primaria: Agosto 11, 2018

Eleksion Heneral: Nobiembre 6, 2018

Programa Pederal iti Pannakaasistir iti Panagbotos (Federal Voting Assistance Program)Ti Federal Voting Assistance Program (FVAP) ket maysa a programa a mangasistir iti panagbotos dagiti kameng ti serbisio ken dagiti pamiliada ken dagiti makipagili nga adda iti ballasiw-taaw.

Federal Voting Assistance Program

Telepono: 800-438-VOTE (8683)

Email: vote@fvap.gov

Website: www.fvap.gov

Dagiti Opisial a Mangasistir iti Panagbotos – Yunit iti Hawaii (Hawaii Unit Voting Assistance Officers)
Dagiti botante a sakupen ti UOCAVA ket mabalinda a kauman ti asino man kadagiti Opisial a Mangasistir iti Panagbotos (Voting Assistance Officers) para iti nayon nga impormasion.

Sanga ti Serbisio Voting Assistance OfficerNumero ti Telepono
Air Force
Hickam AFB
Ms. Agnes Borbely473-4686
Army
Schofield Barracks and Fort Shafter
Mr. Manuel Tagavilla655-5546
Coast GuardMs. Kellie Dean842-2013
Marine Corps
Kaneohe Marine Corps Base
Ms. Deanna Nieves257-8866
Navy
JB Pearl Harbor Hickam
PMRF Barking Sands
LCDR Lena E. Whitehead
Mr. Woldekidan Tegegne
473-4717
335-4732

↑ Agsubli iti ngato



Botante Manipud iti Maysa a Pasilidad a Pagaywanan (Voter in a Care Facility)

Tapno maipanamnama ti seguridad ken integridad dagiti aramid a mainaig iti eleksion kadagiti pasilidad a pagaywanan, makiddaw kadagiti empleado ti saanda a panangbibiang iti botante iti proseso ti panagparehistro ken/wenno panagbotosna nga absentee (di makapan iti presinto). Mabalin a tumulong laeng ti empleado no makaawat iti espesipiko a pammalubos manipud iti residente (botante).

No ti maysa a residente iti maysa a pasilidad a pagaywanan ket kiddawenna ti tulong para iti kinabotantena manipud iti maysa nga empleado ti pasilidad a pagaywanan, dagitoy sumaganad a tarabay ket masapul a maipatungpal tapno masalakniban dagiti kalintegan ti botante:

  • Kasao dagiti kameng ti pamilia tapno tumulongda iti proseso ti rehistrasion ken panagbotos.
  • Siguraduen a magun-od ti residente dagiti amin a kualipikasion tapno makapagparehistro nga agbotos.
  • Idiaya ti maisapsapa a panagbotos para kadagiti residente a mabalin a saan a makapan kadagiti lugan a pagbotosan iti Aldaw ti Eleksion.

Registrasion ti Botante
Ti asino man nga indibidual wenno organisasion ket saanna a mabalin ti agduplikar, mangkopia, wenno mangaramat iti ania man nga impormasion a nailanad kadagiti aplikasion iti rehistrasion ti botante. Mailabsing iti paglintegan para iti asino man a tao ti mangaramatm mangiprinta, mangipablaak, wenno mangiwaras iti impormasion a naala, direkta man wenno saan, manipud kadagiti aplikasion ti rehistrasion ti botante.

Liklikan dagiti nairanta wenno di man nairanta nga aramid a diskriminasion wenno panangpilit iti panagparehistro a kas botante. Agpada dagitoy a maiparit.

Dagiti nakompleto nga aplikasion iti rehistrasion ti botante ket saan a mabalin a kolektaren ti tao wenno organisasion a nagibunong malaksid no adda espesipiko a pammalubos manipud iti klerk wenno iti pangulo nga opisial ti eleksion (chief election officer). Ania man a kiddaw tapno maikkan ti botante iti absentee ballot, masapul a ti botante a mismo ti mangipatulod iti kiddaw babaen ti koreo ket iturongna daytoy iti klerk.

Panagkiddaw iti Balota
Ti paglintegan iti Hawaii ket ipaayanna dagiti awan kapasidadna a botante a mangipatulod iti pannakabagida a mangala iti balotada manipud iti opisina ti klerk. Ti pannakabagi ket masapul a saan ti employer ti botante, wenno pannakabagi ti employer, wenno opisial/pannakabagi ti union a pagkamengan ti botante.

Ti botante ket masapul nga isuratna ti kiddawna iti klerk tapno itedna ti pammalubosna iti klerk a mangipaideliber iti balota babaen ti pannakabagi ti botante ngem saan a ti employer ti botante, pannakabagi ti employer, wenno pannakabagi ti union. Ti kiddaw ket masapul nga iramanna dagitoy:

  • Nagan ken apeliedo
  • Adres ti residensia, ken adres a pakaiturongan ti surat
  • Petsa ti pannakayanak
  • Numero ti Social Security
  • Eleksion/Dagiti eleksion a panggepmo a pagbotosan a kas absentee
  • Pirma ti botante

Panagbotos Babaen ti Koreo
No adda empleado ti pasilidad a pagaywanan a mangtulong iti residente iti panagbotosna, siguraduen nga agtalinaed ti empleado a nonpartisan wenno awan kankanunonganna a partido ken masapul nga adda di nakurkurang ngem dua a tao manipud iti agduma a partido politikal a siiimatang. Maaramid daytoy tapno maipanamnama a dagiti kalintegan ti botante ket masalakniban. Kas nayonna, tungpalen koma dagiti sumaganad:

  • Awan ti asino man a mabalin nga agkiddaw iti botante tapno kitaenna no ania ti linaon ti balota wenno no ania ti pili a partido ti botante.
  • Awan ti asino man a mabalin a mangmarka iti balota ti maysa a tao wenno mangidirihe iti panagbotos ti maysa a tao no awan ti pammalubos dayta a tao.
  • Maysa nga illegal nga aramid ti panagpanggep nga agbotos a mangusar iti nagan ti sabali no awan ti espesipiko a pammalubos.

Panagkusit iti Panagbotos ken iti Eleksion
Dagitoy sumaganad nga aramid ket maibilang a panagkusit iti eleksion:

  • Ti maysa a tao a direkta wenno saan a direkta a mangidiaya a mangted iti pabor ken/wenno mangidiaya iti kuarta iti asino man a botante tapno dayta a botante ket ibotos wenno dina ibotbotos ti asino man a partikular a tao.
  • Ti maysa a tao a direkta wenno saan a direkta, personal man wenno babaen ti sabali a tao, a mangballaag, mangpuersa wenno mangbutbuteng iti botante tapno dina ibotbotos wenno botosanna to asino man a particular a tao wenno partido iti ania man nga eleksion.
  • Ti asino man a tao nga agpanggep nga agbotos nga usarenna ti nagan ti sabali a tao, sibibiag wenno natayen, wenno agusar iti parbo a nagan.
  • Ti maysa a tao a nagbotosen a mangiranta ti panagbotosna manen.
  • Ti maysa a tao a mangiranta a mangited iti ad-adu ngem dua a balota para iti isu met laeng a takem iti tiempo ti panagbotos.

Kas sagudayen ti paglintegan iti Hawaii, ti asino man a tao a mangiranta wenno siaammo a mangited iti palso nga impormasion iti aplikasion iti rehistrasion ti botante wenno iti aplikasion iti absentee ket mabalin nga agbasol iti Class C Felony, a madusa iti agingga iti 5 a tawen a pannakaibalud ken/wenno $10,000 a multa.

Kitaen ti mabalin nga iprinta a PAGBASAAN Maipanggep Kadagiti Botante Kadagiti Pasilidad a Pagaywanan (Voters in Care Facilities FACTSHEET).

↑ Agsubli iti ngato



Botante a Makasapul iti Pannakaasistir (Voter Requiring Assistance)

Asino man a botante nga agkasapulan iti tulong tapno makabotos gapu iti rason a pisikal, bisual, adda diperensia ti panagdengngegna, wenno di makabasa wenno makasurat, ket mabalin nga ipaayan iti tulong ti maysa a tao a bukod a pili ti botante, ngem saan a ti employer ti botante, pannakabagi ti employer ti botante, wenno opisial wenno pannakabagi ti union a pagkamengan ti botante.

Rehistrasion ti Botante (Voter Registration)
Ti Wikiwiki Pormulario ti Rehistrasion ti Botante ken Permanente a Panagbotos Babaen ti Koreo (Wikiwiki Voter Registration and Permanent Absentee Applications) ken Wikiwiki Aplikasion ti Absentee a Botante (Wikiwiki Absentee Applications) ket mabalin a maala iti bersion daytoy iti Insik, Ilokano, ken Hapon.

Maiparit ti panagkopia, panagduplikar wenno ania man a panangusar iti ania man nga impormasion a nailanad kadagiti pormulario ti rehistrasion. Kompidensial ti impormasion nga inted ti indibidual iti affidavit para iti rehistrasion.

Kanayon koma a panunoten dagiti karbengan iti panagbotos ti maysa nga indibidual. Liklikan dagiti aramid a nalawag a panangdiskriminar ken panangpilit iti tao nga agparehistro. Agpada dagitoy a maiparit.

Dagiti nakompleto a pormulario ti rehistrasion ti botante ket saanto a kolektaren ti tao wenno ti organisasion a nagiwaras malaksid no adda espesipiko a pammalubos nga inted ti klerk wenno ti hepe nga opisial ti eleksion (chief election officer).

No Agbotos Babaen ti Koreo
No asistiran ti maysa a botante, ti tao a mangipaay iti tulong, masapul nga agtalinaed nga awan pabpaboranna a partido ken masapul nga adda di nakurkurang ngem dua a tao manipud iti aggidiat a partido politikal a siiimatang. Daytoy ti mangpukaw iti ania man a panangipagarup iti kaadda dagiti irregularidad bayat ti panangasistir iti botante.

  • Awan ti asino man a mapalubosan nga agkiddaw iti botante tapno ipakitana ti linaon ti balotana wenno ti pilina a partido.
  • Awan ti asino man a mabalin a mangmarka iti balota ti maysa a tao wenno mangidirihe wenno mangimaton iti panagbotos ti maysa a tao no awan ti pammalubos.
  • Maysa nga illegal nga aramid ti panangpadas nga agbotos iti nagan ti pasiente nga awan ti espesipiko a pammalubos.

No agakem a kas mangibagi iti botante tapno alaem ti balotana (absentee ballot), masapul nga adda surat ti pammalubos manipud iti rehistrado a botante sa maisubmitir iti Klerk.

Iti Lugar a Pagbotosan (At a Polling Place)
Amin a lugar a pagbotosan ket matungpalna dagiti rekisito ti Linteg Maipanggep Kadagiti Amerikano nga Addaan iti Disabilidad (Americans with Disabilities Act wenno ADA), ken kaaduanna kadagitoy ti addaan iti nasuro a pagparkingan. Dagiti botante nga agkasapulan iti pannakaasistir ket mabalinda ti agkiddaw iti tulong iti Estasion a Pakaalaan iti Tulong Para iti Botante (Voter Assistance Station) iti ania man a lugar a pagbotosan. Dagiti lugar a pagbotosan ket addaanda kadagitoy sumaganad a serbisio:

Dagiti Makatulong a Ramit (Auxiliary Aids Kit)
Amin a lugar a pagbotosan ket addaan kadagiti ramit a makatulong iti pannakaasistir dagiti botante, kas koma kadagiti magnifier (pagpadakkel iti makita), giya iti panagpirma, ken kard a nakaisuratan dagiti pagannurotan a para kadagiti botante nga adda diperensia ti panagdengngegda.

Panagbotos iti Ayan ti Lugan (Curbside Voting)
Dagiti botante a dida kabaelan ti rummuar iti luganda, mabalinda ti agbotos babaen ti panangusarda iti serbisio ti curbside voting wenno panagbotosda a saandan a pumampanaw iti ayan ti luganda.

Elektroniko a Makina a Mausar iti Panagbotos (Direct Recording Electronic (DRE) Voting Machines)
Dagiti DRE voting machines wenno elektroniko a makina a maaramat iti panagbotos ket ipanamnamada ti kinapribado ken kinawayawaya, ken salaknibanna ti kalintegan dagiti botante nga addaan iti disabilidad wenno banay iti bagi ken dagiti botante a limitado ti ammoda iti lengguahe nga Ingles.

Ti DRE ket tulonganna iti panagbotos dagiti indibidual nga addaan iti disabilidad wenno banay ti bagi, agraman ti panangtulongna kadagiti bulsek wenno adda diperensia ti panagkitada tapno makapagbotosda. Mangipaay pay daytoy iti pannarabay iti lengguahe tapno makabotos dagiti botante a sanay laeng iti ania man kadagitoy a lengguahe: Insik, Ilokano, ken Hapon kas sagudayen ti Linteg iti Kalintegan nga Agbotos (Voting Rights Act).

Tulong iti Lengguahe (Language Assistance)
Kadagiti botante a marigatan a makaawat iti lengguahe nga Ingles, mabalin a maipaayanda iti tulong nga oral (maisao) ken/wenno maisurat.

Dagiti Nayon a Serbisio (Additional Services)
No kasapulan ti tulong dagiti American Sign Language interpreters (agusarda iti senias), agkiddaw iti serbisioda iti uneg ti lima (5) a working days (aldaw nga adda trabaho) sakbayna ken para kadagiti laeng lugar a pakaangayan ti maisapsapa a panagbotos (early walk-in locations).

Adda dagiti nairekord wenno nai-tape a mensahe a mangipaay iti impormasion maipanggep iti panagbotos iti Hawaii a maala iti Opisina Dagiti Eleksion ken iti Biblioteka a para kadagiti Bulsek ken Addaan Pisikal a Disabilidad (Library for the Blind and Physically Handicapped).

Maala dagiti impormasion maipanggep iti eleksion babaen ti panangkontak iti Opisina Dagiti Eleksion, wenno babaen ti panangusar iti telepono a para kadagiti adda diperensia ti panagdengngeg ken panagsaoda wenno Telecommunications Relay Service (TRS) iti 711.

Kitaen ti mabalin nga iprinta ti PAGBASAAN Maipanggep iti Pannakaasistir ti Botante (Voter Assistance FACTSHEET).

↑ Agsubli iti ngato



Dagiti Botante a Nasentensiaan Gapu iti Krimen (Voters with a Felony Conviction)

Ti maysa a tao a nasentensiaan para iti nadagsen a krimen (felony), manipud iti oras a pannakasentensiana agingga iti pinal a pannakaruk-at daytoy, ket mabalin a saan a makabotos iti eleksion. Ti maysa nga akusado ket mabalin a makabotos bayat ti kaaddana iti probation wenno kondisional a wayawaya wenno bayat nga isuna ket parolado.

Kontakem ti makasakup iti lugaryo nga Opisina ti Klerk (Clerk’s Office) maipanggep kadagiti dokumentasion a kasapulan sakbay ti panagparehistro.

Kitaen ti mabalin nga iprinta a PAGBASAAN Maipanggep iti Ti Ibunga ti Pannakasentensia Gapu iti Nadagsen a Krimen (Impact of a Felony Conviction FACTSHEET). Para iti kompleto nga impormasion, basaen ti Konstitusion ti Estado ti Hawaii Artikulo II, Seksion 2, ken Dagiti Narebisar a Paglintegan ti Hawaii (HRS) §831-2.

↑ Agsubli iti ngato



Agparehistro nga Agbotos Babaen ti Online (Register to Vote Online)

Tapno mausarmo ti Panagparehistro Dagiti Botante Babaen ti Online, kasapulam dagiti sumaganad:

Ti agdama nga iggemmo a Lisensia nga Agmaneho iti Hawaii wenno Identification card a naggapu iti Estado ti Hawaii
Ti Numero ti Social Security.

Mangrugi Ditoy iti Panagparehistro Dagiti Botante Babaen ti Online

 

 

↑ Agsubli iti ngato



Ammuem no sadino ti presinto a pagbutosam (Find Your Polling Place)

Ammuem no sadino ti presinto a pagbutosam

 

↑ Agsubli iti ngato



Rehistrasion

Dagiti Kualipikasion

  • Makipagili (sitisen) iti U.S.

Saan a kualipikado dagiti saan a makipagili iti U.S., agraman dagiti U.S. Nationals

  • Residente iti Estado ti Hawaii

Ti residensia nga ibaga ti aplikante ket saan a gapu ta adda iti daytoy nga Estado, no di ket nagun-odna ti residensia gapu ta panggepna a pagbalinen ti Hawaii a legal a residensia wenno    pagnaedanna a kabuyogna dagiti obligasion ti maysa a residente iti daytoy nga Estado.

  • Di nakurkurang ngem sangapulo ket walo (18) ti tawenna

Ti paglintegan iti Hawaii ket ipalubosna kadagiti kualipikado nga indibidual nga agparehistroda a nasapsapa (pre-register) iti edadda a sangapulo ket innem (16). Inton agtawendan iti sangapulo ket walo (18), automatikonton a nakarehistroda.

Wagas ti Panagparehistro

Online: Bisitaen ti www.elections.hawaii.gov. Masapul nga addaanka iti agdama a Lisensia nga Agmaneho iti Hawaii (Hawaii Driver’s License) wenno ID ti Estado (State ID) tapno makompletom ti aplikasinomo iti online.

Koreo: Ipatulodmo ti Wikiwiki Pormulario ti Rehistrasion ti Botante ken Permanente a Panagbotos Babaen ti Koreo (Wikiwiki Voter Registration and Permanent Absentee Application) iti makasakup kenka nga Opisina ti Klerk (Clerk’s Office).

Personal nga Ipapan: Mapanka iti Opisina Dagiti Eleksion (Office of Elections) wenno iti Opisina ti Klerk tapno personal nga isubmitirmo ti aplikasionmo.

Maalam dagiti aplikasion iti online iti www.elections.hawaii.gov ken iti ania man kadagitoy a lugar:

  • Opisina Dagiti Eleksion
  • Kadagiti Opisina ti Klerk
  • Kadagiti Biblioteka ti Estado
  • Kadagiti Opisina Postal ti U.S.
  • Kadagiti Ahensia ti Estado
  • Kadagiti Sanga (Satellite) ti City Hall

Nasapa a Panagbotos – Dagiti qualificado nga agtataeng ditoy Hawaii mabalin da agrehistro ken agbotos, isu met laeng nga aldaw . . cadaytoy nasapa a panagbotos, cadagiti naipatuldo a disso.

Para iti listaan a disso, visitaen www.elections.hawaii.gov/voters/early-voting

Gundaway a Panagbotos Babaen ti Koreo
Iti aplikasion ti rehistrasion ti botante, adda seksion ditoy a pakaitedan kenka ti opsion wenno gundaway tapno makiddawmo ti permanente a panagbotosmo babaen ti koreo. Mabalin a kompletuen dagiti aplikante daytoy a seksion no kayatda a maawatda dagiti balotada babaen ti koreo para kadagiti amin nga eleksion iti masakbayan.

Dagiti Damoda ti Agbalin a Botante
No damom ti agparehistro a botante iti Estado ti Hawaii ken ikoreo wenno ibusonmo ti aplikasionmo, ti linteg pederal ket kiddawenna kenka a mangitedka iti pammaneknek iti kinaasinom. Ti pammaneknek iti kinaasino ket iramanna ti kopia ti:

  • Agdama ken balido nga I.D. nga adda retratom (photo identification); wenno
  • Agdama a utility bill (nagbayadan iti koriente wenno danum, kdp.), deklarasion ti banko (bank statement), tseke manipud iti gobierno, paycheck, wenno sabsabali pay a dokumento manipud iti gobierno a mangipakita iti nagan ken adresmo.

No dimo maipakuyog dagiti kasapulan a pammaneknek ti kinasinom iti aplikasionmo, kasapulan nga ipakitamto dagitoy iti lugar a pagbotosan, wenno ipakuyogmonto inton ibusonmo ti balota a nagbotosan.

Dagiti Dusa
Ti asino man a tao a siaammo a nangited iti palso nga impormasion iti affidavit iti rehistrasion ti botante ken mabalin nga agbasol iti Class C felony, a medusa iti agingga iti lima (5) a tawen a pannakaibalud ken/wenno $10,000 a multa. Dagiti Narebisar a Paglintegan ti Hawaii (HRS) §19-3.5

Dagiti Maudi nga Aldaw (Deadlines) iti Panagidatag iti Aplikasion
Ti aplikasion ket masapul a mamarkaan ti opisina postal ken maipatulod iti makasakup kenka nga Opisina ti Klerk iti di naladladaw ngem:

Eleksion Primaria: Hulio 12, 2018

Eleksion Heneral: Oktubre 8, 2018

↑ Agsubli iti ngato



Boluntario

Dagiti Opisial nga Agserbi iti Aldaw ti Eleksion ket marekrutda tapno tarabayenda dagiti botante, mangipaay iti suporta operasional, ken tapno ipanamnamada ti kaadda ti integridad ti proseso ti panagbotos.

Malaksid nga adu ti masursuro ken mapadasan dagitoy a boluntario iti proseso elektoral, adda pay maipaay kadakuada a bayad. Agbatay ti oras ti trabaho iti pagsaadan.

Dagiti Aldaw ti Eleksion
Eleksion Primaria: Agosto 11, 2018

Eleksion Heneral: Nobiembre 6, 2018

Silulukat dagiti pagbotosan manipud alas 7:00 iti bigat agingga iti alas 6:00 iti malem.

Dagiti Kualipikasion

  • Di nakurkurang ngem 16 ti tawenna iti kaaldawan wenno sakbay ti Hunio 30 iti dayta a tawen ti eleksion.
  • Maysa a rehistrado wenno naisapsapa a nairehistro (pre-registered) a botante iti Estado ti Hawaii.
  • Masapul a makabasa ken makasurat iti Ingles.

Dagiti Opisial nga Agserbi iti Aldaw ti Eleksion

Mangimaton iti Control Center (Control Center Operator)
Agsungbat kadagiti maitelepono a saludsod ken kiddaw manipud kadagiti lugar a pagbotosan babaen ti panagusar iti computer-based call center system. Karaman kadagiti pagrebbengan ti panagiserrek iti impormasion, panagsapul kadagiti solusion, ken panangrisut kadagiti problema.

Bayad: $85

Opisial ti Sentro ti Pagbilangan (Counting Center Official)
Agproseso, agilista/agtabular ken agipatulod kadagiti resulta ti eleksion iti husto a wagas ken iti umno nga oras. Buklen ti siam (9) a team wenno grupo.

Bayad: $85-95

  • Grupo Para iti Absentee Ballot (Absentee Ballot Team): Agisagana kadagiti balota a maikoreo para iti pinal a pannakaproseso ken pannakailista/pannakatabularda.
  • Grupo a Mangaywan Kadagiti Balota (Ballot Storage Team): Agimbentario, agurnos, agidulin, ken siguraduenda a natalged dagiti amin a balota.
  • Grupo Para iti Computer Operations (Computer Operations Team): Imatonan ken imbentarioenda dagiti tabulasion dagiti botos.
  • Grupo Para iti Panagduplikar (Duplication Team): Agaramidda kadagiti saggaysa a duplikado dagiti nadadael a balota a di mabasa wenno maproseso ti central scanner.
  • Grupo Para iti Panagamiris (Manual Audit Team): Auditen wenno baliwanda nga amirisen dagiti nagbotosan a balota (voted ballots) tapno maipanamnama ti kinatalged ken integridad ti sistema ti panagbilang iti botos.
  • Grupo Dagiti Agpaliiw (Official Observer Team): Agpaayda a “mata ken lapayag” ti sibubukel a publiko wenno dagiti umili tapno maipanamnama ti kinatalged ken integridad ti sistema ti panagbilang iti botos.
  • Grupo Dagiti Agamiris iti Listaan Dagiti Botos (Poll Book Audit Team): Beripikarenna no husto met laeng ti bilang dagiti botos a maidilig iti rumrummuar iti kompiuter. Auditenna dagiti poll books wenno listaan dagiti agbotos tapno maipanamnama ti kinatalged ken integridad ti sistema ti panagbilang iti botos.
  • Grupo Para iti Pagikargaan iti Presinto (Precinct Can Team): Agawat, agimbentario, ken agiwaras kadagiti suplay a mainaig iti eleksion nga adda kadagiti precinct cans (pagikargaan) kadagiti kadagiti nadumaduma nga indibidual ken kadagiti team/grupo.
  • Grupo a Para Awat (Receiving Team): Awatenna tapno aywananna dagiti nagbotosan a balota, dagiti precinct can, ken dagiti ramit a mausar iti panagbotos iti pagbilangan (counting center).

Opisial a Para iti Panagideliber/Panagkolektar (Delivery/Collection Official)
Agideliber wenno agitulod kadagiti balota ken suplay a mausar iti eleksion kadagiti lugar a pagbotosan iti nasapa bigat ti aldaw ti eleksion. Ti tunggal team ket buklen ti dua a kameng.

Bayad: $50 – $95

  • Pangulo wenno Chair: Ikoordinar ken idirihena dagiti aktibidad ti D/C Team. Kompletuenna ti dokumentasion ken sertipikiranna ti panakaiserra dagiti suplay a maaramat iti eleksion.
  • Kameng: Asistiranna ti Pangulo ken saksianna ti pannakayallatiw ti pannakaaywan dagiti balota ken dagiti suplay a maaramat iti eleksion.

Opisial a Para Kadagiti Impormasion a Mainaig iti Eleksion) Election Information Services Official
Sungbatanna dagiti saludsod manipud iti publiko ken idanonna dagiti espesial a situasion wenno sirkumstansia kadagiti maseknan nga opisial.

Bayad: $85

Opisial ti Pasilidad (Facility Official)
Isagana wenno ipatakderna dagiti ramit a maaramat iti eleksion kadagiti lugar a pagbotosan iti rabii sakbay ti eleksion. Isaganana dagiti pagnaan nga agturong kadagiti lugar a pagbotosan iti aldaw ti eleksion. Distrongkaen ken idulinna dagiti ramit a nausar iti eleksion kalpasan a nagserra dagiti lugar a pagbotosan iti aldaw ti eleksion.

Bayad: $60 – $140

Opisial ti Presinto (Precinct Official)
Tarabayen wenno asistiranna dagiti botante iti lugar a pagbotosan malaksid nga ipanamnamana ti integridad ti panagbotos. Dagiti Opisial ti Presinto ti mangimaton iti Disso ti Impomasion ken Pakaipakitaan No Kasano ti Agbotos (Information and Ballot Demonstration Station), Disso nga Ayan ti Listaan Dagiti Agbotos (Poll Book Station), Disso a Pagitinnagan iti Balota (Ballot Box Station), ken Disso Para iti eSlate (eSlate Station).

Bayad: $5 – $175

Mainayon pay dagitoy nayon a takem wenno posision:

  • Pangulo ti Presinto (Precinct Chairperson): Imatonanna ti lugar a pagbotosan ken isu ti akinresponsibilidad iti seguridad ken integridad dagiti balota a nayisyu ken dagiti balota a nagbotosan wenno naaramat.
  • Opisial a Mangasistir iti Botante (Voter Assistance Official): Tulongan wenno asistiranna ti chairperson a mangimaton iti lugar a pagbotosan. Isu ti mangimaton iti Disso a Pakaasistiran ti Botante (Voter Assistance Station). Asistiranna dagiti botante ken isu ti makaammo kadagiti maaramid kadagiti espesial a situasion.
  • Pang-emerhensia nga Opisial ti Presinto (Standby Precinct Official): Mapan iti headquarters iti bigat ti aldaw ti eleksion ket urayenna ti pakaipatulodanna a lugar a pagbotosan a makasapul iti nayon a tao.
  • Mangisasaup nga Opisial ti Eleksion (Alternate Election Officials): Agtalinaed iti pagtaenganna iti bigat ti aldaw ti eleksion ket urayenna ti tawag a pannakaipatulodna iti lugar a pagbotosan a makasapul iti nayon a tao.

Para Urnos Kadagiti Problema ti Presinto (Precinct Troubleshooter)
Monitorenna dagiti lugar a pagbotosan tapno maipasigurado a sursuroten dagiti Opisial dagiti nailanad a pagannurotan wenno dagiti standard operating procedures; ken no agkurangen iti suplay dagiti lugar a pagbotosan, mapan agipan. Masapul nga addaan iti balido a lisensia nga agmaneho.

Dagiti Restriksion
Awan ti nagannak, asawa, reciprocal beneficiary, anak, wenno kabsat ti kandidato a mabalin nga agpaay a kas opisial ti presinto (precinct official) iti ania man a presinto a mabalin a pakaitinnagan ti botos para iti dayta a kandidato.

Awan ti kandidato a para iti elektibo a posision a mabalin nga agpaay nga opisial ti presinto iti isu met laeng nga eleksion a pagtarayanna a kas kandidato.

Awan ti kandidato a napaay a nainominar iti eleksion primaria wenno espesial nga eleksion primaria a mabalin nga agserbi a kas opisial ti presinto iti sumaruno nga eleksion heneral.

Gundaway Para iti Panagur-or iti Pondo
Dagiti nonprofit nga organisasion ket mabalinda ti agboluntario nga Opisial nga Agserbi iti Aldaw ti Eleksion a kas pagur-orda iti pondo. Masapul a mangted ti tunggal organisasion iti sertipiko a naurnos ti kasasaadna iti panagbuisan (tax clearance certificate), kasuratan ti katulagan (memorandum of agreement), ken ti listaan dagiti volunteers nga immanamong a mangidonar iti bayadda.

Awan ti ania man a political action committees wenno grupo a nabuangay a para kadagiti panggep a politikal a mabalin a makipartisipar.

Kasano ti Agpalista
Tumawag iti opisina dagiti lokal nga eleksion a makasakup iti lugaryo wenno bisitaen ti website ti Opisina Dagiti Eleksion (Office of Elections) iti www.elections.hawaii.gov.

Hawaii: 933-1591

Maui: 270-7749

Kauai: 241-4800

Honolulu: 453-8683

Kitaen ti mabalin nga iprinta a View printable PAGBASAAN Maipanggep iti Dagiti Opisial nga Agserbi iti Aldaw ti Eleksion (Election Day Officials FACTSHEET).

↑ Agsubli iti ngato



Dagti Kampania a Para iti Rehistrasion Dagiti Botante (Voter Registration Drives)

Panagkiddaw Kadagiti Materiales
Tapno makakiddaw kadagiti materiales a para iti rehistrasion ti botante, kontaken ti Opisina Dagiti Eleksion (Office of Elections).

Nakasagana koma a mangited kadagiti sumaganad nga impormasion:

  • Nagan
  • Numero ti Telepono
  • Ahensia/Organisasion
  • Adres

Panagisubmitir Kadagiti Aplikasion ti Rehistrasion ti Botante
Irekomendarda a dagiti agparehistro ket idatagda a bukbukodda, babaen ti koreo wenno personal, kadagiti nakompleto a pormularioda iti makasakup kadakuada nga Opisina ti Klerk (Clerk’s Office).

Nupay kasta, no ti indibidual ket pilienna nga isubmitir ti pormulariona babaen ti grupo a nangangay iti kampania a para iti rehistrasion, dayta a banag ket addan iti nagbaetan ti indibidual ken ti nasao a grupo.

Kitaen ti mabalin nga iprinta a PAGBASAAN Maipanggep iti Dagiti Kampania a Para iti Rehistrasion Dagiti Botante (Voter Registration Drives FACTSHEET). Para iti kompleto nga impormasion maipanggep iti panagiprinta ken panagduplikar kadagiti aplikasion, basaen ti Pagannurotan Administratibo ti Hawaii (HAR) §§3-172-23 ken 3-174-5.

 

↑ Agsubli iti ngato



Panagbotos iti Hawaii (Voting in Hawaii)

Kayatmo nga ad-adu pay ti ammom maipanggep kadagiti eleksion ken panagbotos iti Hawaii? Usaren ti sumaganad a kas tarabay tapno maawatan dagiti nadumaduma a klase ti eleksion, panagparehisrto, ken dagiti karbengam a kas botante.

Dagiti Eleksion iti Hawaii

Iti tunggal “even numbered” a tawen (daytay tawen nga aggibus iti 0, 2, 4, 6 ken 8), mangangay ti Hawaii iti Eleksion Primaria iti Agosto ken Eleksion Heneral iti Nobiembre.

Eleksion Primaria

Maangay ti Eleksion Primaria tapno mainominar dagiti kandidato a mangibagi kadagiti partido politikal iti Eleksion Heneral. Iti daytoy a proseso ti nominasion, a maawagan iti Maymaysa a Partido iti Primaria (Single Party Primary), makiddaw kadagiti botante ti panangpilida kadagiti kandidato manipud iti pilida laeng a partido. Iti isu met laeng a wagas, dagiti kandidato nga awan ti pagkamenganda nga espesipiko a partido ket mainominarda para iti Eleksion Heneral a kas awan partidona a kandidato (nonpartisan candidate). Agtalinaed a palimed no ania ti pinilim a partido ken no asino dagiti pinilim a kandidato.

Dagiti kandidato a para iti Opisina Dagiti Pakaseknan ti Hawaii (Office of Hawaiian Affairs), ken dagiti mapagbobotosan iti county (county contests) ket agparang met iti balota a para iti Eleksion Primaria. Amin a botante, ania man ti partido a pagkamenganda, ket agbotosda kadagitoy a mapagbobotosan.

Eleksion Heneral

Ti Eleksion Heneral ket maysa a pagsasalipan dagiti kandidato (candidate contest), a kayatna a sawen, dagiti botante ket mabalinda nga ibotos ti maysa a kandidato a pilida ania man ti partido a pagkamenganna wenno uray pay awan partido a pagkamenganna. Dagiti botante ket mangpilida kadagiti kandidato iti pederal, estado, county, ken Office of Hawaiian Affairs, agraman dagiti Enmienda ti Konstitusion ken dagiti Enmienda ti Charter.

Eleksion iti Opisina Dagiti Pakaseknan ti Hawaii (Office of Hawaiian Affairs Elections)

Ti Office of Hawaiian Affairs (OHA) ket maysa nga ahensia publika a responsible iti panakaituding dagiti pagalagadan ken mangimaton kadagiti kinabaknang ti ahensia.

Ti OHA ket imatonan ti siam (9) ti kamengna a Hunta (Board of Trustees) a mabotosan nga agtugaw iti takemda nga agpaut iti uppat-a-tawen a termino. Saan a malimitaran ti bilang ti termino a pagpaayan ti maysa a trustee. Dagiti kandidato a para iti OHA ket mainominarda iti Eleksion Primaria ken mabotosanda bayat ti Eleksion Heneral. Amin a botante iti sapasap nga estado ket mapalubosanda nga agbotos iti tunggal panagpipili dagiti agtakem iti OHA.

Dagiti Eleksion Presidensial

Saan a mangang-angay ti Hawaii iti primaria presidensial. Dagiti kualipikado a partido politikal ti agpili kadagiti kandidato a para presidente ken bise presidente, agraman dagiti elector a mangipabagi iti partido iti Kolehio Elektoral (Electoral College).

Ti Kolehio Elektoral ti opisial a mangpili no asino dagiti agtugaw a presidente ken bise presidente ti Estados Unidos. Ammuem ti ad-adu pay maipanggep iti Kolehio Elektoral (Electoral College).

Para iti ad-adu pay nga impormasion maipanggep kadagiti no ania dagiti mapagbobotosan nga agparang iti balota, kitaen ti dagiti takem a mapagbobotosan (contest schedule).

Panagparehisto nga Agbotos

Tapno makapagparehistro a botante iti Estado ti Hawaii, dagiti indibidual ket masapul a magun-odda dagitoy sumaganad a kualipikasion:

Ti paglintegan ti Hawaii ket ipalubosna kadagiti kualipikado nga indibdual a mangisapsapa iti panagparehistroda (pre-register) no agtawendan iti sangapulo ket innem (16). Inton madanondan ti tawenda a sangapulo ket walo (18), automatikonton a rehistradoda a botante.

Nayonan ti ammom maipanggep iti rehistrasion ti botante (voter registration).

Dagiti Damoda ti Agbotos iti Hawaii

No damom ti agparehistro tapno makabotoska iti Estado ti Hawaii ket ipatulodmo babaen ti koreo ti aplikasionmo, ti linteg pederal ket ibilinna a mangipaayka iti pammaneknek iti kinaasinom. Ti pammaneknek iti kinaasino ket iramanna ti maysa a kopia ti:

  • Agdama ken balido nga I.D. nga addaan iti retratom (photo identification); wenno
  • Agdama a utility bill (pakakitaan iti nagbayadam iti koriente, danum ken dadduma pay a serbisio utilidad), deklarasion ti banko (bank statement), tseke manipud iti gobierno, paycheck, wenno ania man a dadduma pay a dokumento manipud iti gobierno a mangipakita iti nagan ken adresmo.

No dimo maipakuyog ti kasapulan a mangipaneknek iti kinaasinom iti aplikasionmo, makiddaw nga ipakitamto daytoy iti lugar a pagbotosan, wenno ipakuyogmonto iti ikoreom a balota a nagbotosam (mail ballot).

Panagbotos

Saan a nasken nga urayen dagiti botante a dumteng ti aldaw ti eleksion tapno makapagbotosda. Asino man a rehistrado a botante ket mabalinna ti agkiddaw iti maikore a balota (mail ballot) wenno mabalinna ti mapan agbotos iti ania man nga early walk-in location (lugar a pagbotosan dagiti kayatna a maisapsapa ti panagbotosna) iti sakup ti county a pagnaedanda.

Nayonan ti ammo maipanggep iti maisapsapa a panagbotos (early voting).

Ti botante a kaykayatna ti agbotos iti mismo nga aldaw ti eleksion ket mabalinna ti mapan iti naituding a lugar a pagbotosanna. Silulukat dagiti lugar a pagbotosan manipud iti alas 7:00 iti bigat agingga iti alas 6:00 iti malem iti aldaw ti eleksion. Mabalinmo nga ammuen no sadino ti lugar a pagbotosam babaen ti panangkontakmo iti Opisina Dagiti Eleksion (Office of Elections).

Adda Pay Saludsodmo? Bisitaen ti Dagiti Masansan a Masaludsod (Frequently Asked Questions) para kadagiti sungbat ti kaaduanna kadagiti gagangay a masalsaludsod maipanggep iti panagbotos iti aldaw ti eleksion ken adu pay a sabsabali.

↑ Agsubli iti ngato