Dagiti Pagalagadan

Pagannurotan iti Pannakaala Kadagiti Impormasion

Kayat ti Ehawaii.gov a makastrek amin a tattao iti egovernment wenno maala ken mausar amin a tattao dagiti kasapulanda nga impormasion maipanggep iti gobierno.
Idi 1998, inamendaran ti Kongreso ti Linteg iti Rehabilitasion (Rehabilitation Act) ket nabilin dagiti ahensia Pederal a mamagbalin iti elektroniko ken teknolohiada iti impormasion a nalaka a pakaalaan dagiti tattao nga addaan iti disabilidad wenno an-annayen iti bagi kadagiti kasapulanda nga impormasion. No ngamin narigat a mausar ken maawatan ti maysa a teknolohia, pengdanna met ti napardas ken nalaka a panangala ken panangusar ti maysa a tao iti kasapulanna nga impormasion. Naipaulog ti Seksion 508 tapno pukawenna ti panagparikut dagiti tattao iti panagusar iti teknolohia iti impormasion, tapno ipaayanna kadagiti baro nga oportunidad dagiti tattao nga addaan iti disabilidad wenno an-annayen iti bagi, ken tapno maparegta ti pannakapasayaat dagiti teknolohia tapno iti kasta, magun-od met dagitoy a panggep.

Daytoy a website ket nadisenio tapno maibagay kadagiti nadumaduma a maar-aramat a browser ken, iti pammati dagiti nagdisenio, adda met dagiti dadduma pay a makatulong a teknolohia tapno nalaklaka ti pannakaaramatna. Ngarud, nadisenio met daytoy tapno magun-odna dagiti kasapulan a kidkiddawen ti “Web Content Accessibility Guidelines 2.0” ti W3C, a maala iti https://www.w3.org/TR/WCAG20/, level A. Ti panggepmi ket isu ti agtultuloy a panagtrabahomi tapno dagiti kasapulan nga impormasion ket nalaka a maala ken mausar dagiti amin a tattao; ngarud, ar-aramidenmi ti amin tapno magun-odmi ti lebel a Double-A compatibility.

Ti pannakapasayaat ti pannakaala ken pannakausar dagiti umili nga addaan iti disablidad wenno an-annayen iti bagi kadagiti kasapulanda nga impormasion ti maysa kadagiti kangrunaan a nakaiturongan ti imatangmi, ket kankanayonkami nga agawat kadagiti singasing ken komento para iti daytoy a panggep.
Palagip: Mapataran ti eHawaiiGov dagiti kasapulan a kas sagudayen dagiti pagalagadan ti W3C, ngem di maipanamnama a dagiti links kadagiti sites iti ruar ti portal architecture ket mabalin a maluktan.